რეგიონებში საზოგადოებრივი ცენტრების მშენებლობა გრძელდება

15002517_1808255126098081_5366971392472310707_oსაქართველოში რიგით 42-ე საზოგადოებრივი ცენტრი ცაგერის მუნიციპალიტეტის სოფელ ლაჯანაში სახელმწიფო სერვისების განვითარების სააგენტოს თავმჯდომარემ, გიორგი პატარიძემ და რაჭა-ლეჩხუმის რწმუნებულმა, პაპუნა მარგველიძემ გახსნეს.
საზოგადოებრივი ცენტრის მომსახურებით სოფელ ლაჯანის მოსახლეობის გარდა ისარგებლებს გაგულეჩის, ორბელის, სპათაგორის, ლეშკედას, ლაცორიას, წილამიერის, კურცობის, ხოჯის, უსახელოს, ლაილაშის, თაბორისა და სურმუშის 5 000-ზე მეტი მოსახლე.
საზოგადოებრივი ცენტრი საჯარო და კერძო სექტორის წარმატებული თანამშრომლობის საუკეთესო მაგალითია, რომელიც მნიშვნელოვნად ზოგავს ადგილობრივთა დროსა და ფინანსებს. სოფლის მოსახლეობას ის სახელმწიფო და კერძო სექტორის 200-ზე მეტ სერვისს სთავაზობს. საზოგადოებრივი ცენტრების მთავარი მახასიათებელი ადგილობრივთა საჭიროებებზე ორიენტაციაა. ცენტრები მომხმარებელს მრავალფეროვან სერვისებს, გამარტივებულ პროცედურებს, საინფორმაციო ტექნოლოგიებთან წვდომასა და თანამედროვე ინფრასტრუქტურას სთავაზობენ.
ლაჯანის საზოგადოებრივი ცენტრის გახსნით სოფელში არა მხოლოდ საჯარო სერვისები, არამედ „მაგთისა“ და „ლიბერთი ბანკის“ მომსახურებაც გახდება ხელმისაწვდომი, რაც პენსიონერებს − პენსიის სოფლიდან გაუსვლელად მიღების, ახალგაზრდებს კი უკაბელო ინტერნეტით უფასოდ სარგებლობის საშუალებას მისცემს.
საქართველოს მასშტაბით მოქმედ საზოგადოებრივ ცენტრებში 200-მდე ადგილობრივი მოსახლეა დასაქმებული და 250 000-მდე სერვისია გაცემული.
დღესდღეობით საზოგადოებრივი ცენტრები ფუნქციონირებს: შაშიანში, სართიჭალაში, გომში, რუისში, ჭალადიდში, ხევში, მანგლისში, კოდაში, ფოკაში, ნიგოითში, ჯვარში, შორაპანში, ყვარელწყალში, მუხაესტატეში, გეგუთში, მეჯვრისხევში, კაჭრეთში, ხიდისთავში, ნუკრიანში, კორბოულში, ღორეშაში, კაზრეთში, შილდაში, ორსანტიაში, ქვემო ნატანებში, კაბალში, ლენტეხში, ჩაქვში, ხრეითში, სადახლოში, რუხში, დიდ ჯიხაიში, მარტყოფში, იორმუღანლოში, არხილოსკალოში, ტყვიავში, ვალეში, ბერძენაულში, უსახელოში, კიცხსა და ბარალეთში. წლის ბოლომდე საქართველოს მასშტაბით კიდევ ერთი საზოგადოებრივი ცენტრი სოფელ კუმურდოში (ახალქალაქის მუნიციპალიტეტი) გაიხსნება.
პროექტი ევროკავშირის ფინანსური მხარდაჭერით ხორციელდება.