
სტუმრები საზოგადოებრივი ცენტრების მუშაობის კონცეფციას გაეცნენ და სრული ინფორმაცია მიიღეს იმ მრავალფეროვანი სერვისების შესახებ, რომლებითაც მოსახლეობა ადგილიდან გაუსვლელად სარგებლობს.
იუსტიციის მინისტრის გადაწყვეტილებით, საქართველოს რეგიონებში 2013 წლიდან ხორციელდება საზოგადოებრივი ცენტრების მშენებლობის პროექტი, რომლის მიზანია ადგილობრივი მოსახლეობისთვის სახელმწიფო და კერძო სერვისების ხელმისაწვდომობის გაზრდა და მათთვის მომსახურების ისეთივე მაღალი სტანდარტით მიწოდება, როგორიც დიდ ქალაქებშია.
მოსახლეობას საზოგადოებრივი ცენტრებში საჯარო და კერძო სექტორის 200-ზე მეტი სერვისი მიეწოდება, მაგალითად: სახელმწიფო სერვისების განვითარების სააგენტოს (აიღოს პირადობის დამადასტურებელი საბუთი, დაარეგისტრიროს ქორწინება და ა.შ.), საქართველოს ეროვნული არქივის, საჯარო რეესტრის ეროვნული სააგენტოს და სოციალური მომსახურების სააგენტოს.
საზოგადოებრივი ცენტრები საჯარო და კერძო სექტორის წარმატებული თანამშრომლობის საუკეთესო მაგალითია. მათში განთავსებულია კერძო კომპანიების − „მაგთიკომისა“ და „ლიბერთი ბანკის“ ფილიალები, რაც პენსიონერებს საშუალებას აძლევს, რომ სოფლიდან გაუსვლელად აიღონ პენსია. ცენტრებში მოსახლეობას, ასევე, შეუძლია 24-საათიანი უკაბელო უფასო ინტერნეტით სარგებლობა.
დღეისათვის, საქართველოს მასშტაბით სულ 64 საზოგადოებრივი ცენტრი ფუნქციონირებს.
ტუნისის, პალესტინის და ლიბიის ცენტრალური და ადგილობრივი ხელისუფლების წარმომადგენლები საქართველოში 9 მარტს ჩამოვიდნენ და ვიზიტის ფარგლებში შეხვედრებს მართავენ. ისინი საქართველოს 13 მარტს დატოვებენ.