სამოქალაქო აქტების ჩანაწერში ცვლილების, შესწორების და/ან დამატების შეტანა

სამოქალაქო აქტის ჩანაწერში ცვლილების შეტანა ნიშნავს სამოქალაქო აქტის ჩანაწერში არსებული მონაცემის ახალი მონაცემით შეცვლას.

სამოქალაქო აქტის ჩანაწერში შესწორების შეტანა ნიშნავს სამოქალაქო აქტის ჩანაწერში არსებული არასწორი მონაცემის სწორი მონაცემით შეცვლას.

სამოქალაქო აქტის ჩანაწერში დამატების შეტანა ნიშნავს სამოქალაქო აქტის ჩანაწერში არსებული არასრული მონაცემის შევსებას.

სამოქალაქო აქტის ჩანაწერში ცვლილების, შესწორების ან/და დამატების შეტანის შესახებ განცხადების წარდგენის უფლება აქვს:

• პირს, რომლის მიმართაც რეგისტრირებულია სამოქალაქო აქტის ჩანაწერი;
• თუ სამოქალაქო აქტის ჩანაწერი რეგისტრირებულია 18 წლამდე არასრულწლოვანი პირის მიმართ – მშობელს, მშვილებელს, მეურვეს, ან მზრუნველს;
• თუ სამოქალაქო აქტის ჩანაწერი რეგისტრირებულია სასამართლოს გადაწყვეტილებით შეზღუდული ქმედუნარიანობის მქონე პირის მიმართ – ამ პირს, მისი მზრუნველის თანხმობით;
• მშობელს – შვილის მიმართ რეგისტრირებულ სამოქალაქო აქტის ჩანაწერში საკუთარი მონაცემების ნაწილში;
• მშვილებელს – ნაშვილების მიმართ რეგისტრირებულ სამოქალაქო აქტის ჩანაწერში  საკუთარი მონაცემების ნაწილში.

გარდაცვლილი პირის სამოქალაქო აქტის ჩანაწერში ცვლილების, შესწორების ან/და დამატების შეტანა შესაძლებელია ნებისმიერი დაინტერესებული პირის განცხადების საფუძველზე.