ბინადრობის მოწმობა

ნებისმიერი უცხოელი, რომელსაც მიენიჭა ბინადრობის ნებართვა, ასევე ლტოლვილისა და ჰუმანიტარული სტატუსის მქონე პირი, მიუხედავად ასაკისა, ვალდებულია მიიღოს ბინადრობის მოწმობა.

დაინტერესებულმა პირმა ბინადრობის მოწმობის მისაღებად უნდა მიმართოს სახელმწიფო სერვისების განვითარების სააგენტოს ტერიტორიულ სამსახურებს ან იუსტიციის სახლის ფილიალებს.

ბინადრობის მოწმობა არის ორი ტიპის: მუდმივი და დროებითი.

დროებითი ბინადრობის მოწმობა გაიცემა დროებითი ბინადრობის ნებართვის მქონე პირებზე, ასევე, ლტოლვილისა და ჰუმანიტარული სტატუსის მქონე პირებზე.

მუდმივი ბინადრობის მოწმობა გაიცემა იმ  პირებზე, რომელთაც სააგენტოს დასკვნის საფუძველზე მიენიჭათ მუდმივი ბინადრობის ნებართვა.

პირმა, რომელიც პირველად იღებს მუდმივი ბინადრობის მოწმობას, უნდა წარმოადგინოს:

• სააგენტოს დასკვნა მუდმივი ბინადრობის ნებართვის ან/და მოქალაქეობის არმქონე პირის სტატუსის მინიჭების შესახებ;
• ორი ფოტოსურათი (ფოტოსურათის გადაღებას შეძლებთ სერვისების განვითარების სააგენტოს ფილიალში ან იუსტიციის სახლში. ფოტოსურათის ღირებულება 5 ლარი);
• რეგისტრაციის საფუძველი;
• პირადობის დამადასტურებელი დოკუმენტი (უცხო ქვეყნის მოქალაქის პირადობის დამადასტურებელი დოკუმენტი; დაბადების მოწმობა და სხვ.);
• საფასურის გადახდის დამადასტურებელი ქვითარი.

შენიშვნა: 16 წლამდე ასაკის პირი რეგისტრაციას გადის მშობლებთან, მეურვესთან, მზრუნველთან ან სხვა კანონიერ წარმომადგენელთან ერთად. ასეთ შემთხვევაში, რეგისტრაციის საფუძველი საჭირო არ არის.

დაინტერესებულმა პირმა მოწმობის გამოსაცვლელად და ახლის მისაღებად უნდა წარმოადგინოს:

• მუდმივი ბინადრობის გამოსაცვლელი მოწმობა;
• 2 ფოტოსურათი (ფოტოსურათის გადაღება შესაძლებელია სახელმწიფო სერვისების განვითარების სააგენტოს ტერიტორიულ სამსახურებში ან იუსტიციის სახლის ფილიალებში. ფოტოსურათის ღირებულება 5 ლარია);
• საფასურის გადახდის დამადასტურებელი ქვითარი.

ბინადრობის მოწმობის შეცვლის საფუძველია:

•  საცხოვრებელი ადგილის შეცვლა (გარდა იმ შემთხვევისა, როცა პირი ფლობს პირადობის (ბინადრობის) ახალ მოწმობას);
• მოქმედების ვადის გასვლა;
• სახელის ან გვარის შეცვლა;
• ჩანაწერში უზუსტობის დადგენა;
• გამოყენებისთვის უვარგისობა (გაცვეთა, დაზიანება ან დაკარგვა).

დროებითი ბინადრობის ნებართვის მქონე პირი რეგისტრირდება პირადი განცხადების საფუძველზე.

პირმა, რომელიც პირველად იღებს დროებითი ბინადრობის მოწმობას, უნდა წარმოადგინოს:

• სააგენტოს დასკვნა დროებითი ბინადრობის ნებართვის, მოქალაქეობის არმქონე პირის სტატუსის მინიჭების შესახებ ან/და საქართველოს ოკუპირებული ტერიტორიებიდან იძულებით გადაადგილებულ პირთა, განსახლების და ლტოლვილთა სამინისტროს მიერ პირისათვის ლტოლვილის ან/და ჰუმანიტარული სტატუსის მინიჭების შესახებ;
• ორი ფოტოსურათი (ფოტოსურათის გადაღება შესაძლებელია სახელმწიფო სერვისების განვითარების სააგენტოს ტერიტორიულ სამსახურებში ან იუსტიციის სახლის ფილიალებში. ფოტოსურათის ღირებულება 5 ლარია);
• უცხო ქვეყნის მოქალაქის დამადასტურებელი დოკუმენტი;
• დაბადების მოწმობა (არასრულწლოვანი პირის შემთხვევაში).

შენიშვნა: ლტოლვილისა და ჰუმანიტარული სტატუსის მქონე პირები რეგისტრაციას არ გადიან.

ბინადრობის მოწმობის გაუქმების საფუძვლები

ბინადრობის მოწმობა გაუქმდება:

• დოკუმენტის გაცემისათვის კანონმდებლობით დადგენილი ვადის ამოწურვიდან 1 წლის გასვლის შემდგომ, თუ ამ დროის განმავლობაში არ გადაეცა მფლობელს;
• თუ სააგენტოსათვის ცნობილი გახდა მოწმობის შეცვლის საფუძვლის არსებობის შესახებ (დოკუმენტის ვადის გასვლა, სახელის/გვარის შეცვლა, დაზიანება ან ჩანაწერში უზუსტობის აღმოჩენა);
• თუ პირმა წარადგინა ყალბი დოკუმენტი, რაც გამოვლინდა მოწმობის გაცემის შემდეგ;
• ბინადრობის ნებართვის შეწყვეტის შემთხვევაში;
• ლტოლვილის/ჰუმანიტარული სტატუსის შეწყვეტის შემთხვევაში (დროებით ბინადრობის მოწმობაზე);
• შვილად აყვანისას მონაცემების შეცვლის შემთხვევაში;
• მამობის დადგენისას მონაცემების შეცვლის შემთხვევაში.

მომსახურების ვადა და ღირებულება

მე-10 სამუშაო დღეს – 60 ლარი;

მე-5 სამუშაო დღეს – 80 ლარი;

მე-3 სამუშაო დღეს – 100 ლარი;

მე-2 სამუშაო დღეს – 120 ლარი;

იმავე დღეს – 150 ლარი.

დროებითი ბინადრობის მოწმობა გაიცემა დროებითი ბინადრობის ნებართვის მოქმედების ვადით.

ლტოლვილის სახელზე დროებითი ბინადრობის მოწმობა გაიცემა 3 წლის ვადით.

ჰუმანიტარული სტატუსის მქონე პირზე 1 წლამდე ვადით.

შენიშვნა: მოწმობის საფასური გადაიხდევინება მხოლოდ მოქალაქეობის არმქონე პირებზე დროებითი ბინადრობის მოწმობის გაცემისას.

ბინადრობის ელექტრონული მოწმობის საფასურის გადახდისაგან თავისუფლდებიან:

• სოციალურად დაუცველი ოჯახის წევრები, რომელთა სარეიტინგო ქულა არ აღემატება 70 001–ს – სრულად, აგრეთვე ფოტოსურათის საფასურის გადახდისაგან – სრულად;
• მეორე მსოფლიო ომის, აგრეთვე საქართველოს ტერიტორიული მთლიანობის, თავისუფლებისა და დამოუკიდებლობისათვის საბრძოლო მოქმედებებში მონაწილე პირები – სრულად, აგრეთვე ფოტოსურათის საფასურის გადახდისაგან – სრულად;
• სტუდენტები, რომლებიც სწავლობენ ავტორიზებულ უმაღლეს საგანმანათლებლო დაწესებულებებში და რომელთა სტატუსის გადამოწმება შესაძლებელია სააგენტოს მონაცემთა ბაზის მეშვეობით, პირადობის ელექტრონული მოწმობის აღნიშნული სტატუსით პირველად აღების შემთხვევაში – 10 ლარით, განმეორებით – 10 % (6 ლარით), ხოლო ფოტოსურათის საფასურის გადახდისაგან – სრულად;
• პირები, რომლებზეც შესაძლებელია გაიცეს ბინადრობის ელექტრონული მოწმობა მკვეთრად ან მნიშვნელოვნად გამოხატული შეზღუდული შესაძლებლობის მქონე პირის სტატუსით, დაწესებული მომსახურების საფასურისგან – 50%-ით;
• შეზღუდული შესაძლებლობის სტატუსის მქონე არასრულწლოვნები – 50%-ით;
• საქართველოში სტატუსის მქონე მოქალაქეობის არმქონე პირები – 50%-ით.